Şarl Mişel Ağdam-Xankəndi yolunun əhəmiyyətindən danışdı

“Ağdam-Xankəndi marşrutunun açılması Laçın yolunun paralel istifadəsinə kömək edəcək mühüm addımdır”.

Bu barədə Avropa İttifaqı Şurasının Prezidenti Şarl Mişelin bəyanatında deyilir.

“Biz Rusiya yüklərinin Ağdam-Əsgəran marşrutu ilə keçməsini qeydə alırıq. Bu, yerli əhalinin müntəzəm ərzaq təminatının bərpasına təkan verəcək”, – bəyanatda vurğulanıb.

Ş.Mişel Bakı ilə Qarabağda yaşayan ermənilər arasında dialoqun qurulması, barışıq səyləri və ümumilikdə Ermənistan-Azərbaycan sülh prosesi daxil olmaqla daha konkret addımların atılacağına ümid etdiyini bildirib. Bəyanatda qeyd olunub ki, Aİ rəhbəri Azərbaycan və Ermənistan liderləri ilə təmasları davam etdirir.

Həmçinin bildirilib ki, Ş.Mişel sentyabrın 10-da Yeni Delhidə keçirilən G20 sammiti çərçivəsində Türkiyə Prezidenti Rəcəb Tayyib Ərdoğanla da danışıqlar aparıb.