Şarl Mişeldən beştərəfli görüşlə bağlı açıqlama

“Azərbaycan Prezidenti İlham Əliyev, Ermənistan Baş naziri Nikol Paşinyan, Fransa Prezidenti Emmanuel Makron və Almaniya Kansleri Olaf Şoltsla çox yaxşı görüş oldu”.

Bunu görüşdən sonra mətbuata açıqlamasında Avropa İttifaqı Şurasının Prezidenti Şarl Mişel deyib.

“Bizim mayda Brüsseldə toxunduğumuz bütün mövzuları müzakirə etmək imkanımız oldu. Bizim əlaqələr, təhlükəsizlik, sərhədlərin delimitasiyası və sülh sazişini müzakirə etmək imkanımız oldu. Bu görüş iyulun 21-də Brüsseldə keçiriləcək növbəti görüş üçün çox yaxşı hazırlıq oldu. Bu o deməkdir ki, biz çox çalışırıq və əlaqələrin normallaşması istiqamətində bütün müsbət səyləri dəstəkləmək niyyətindəyik.

Eyni zamanda bu da bəyan edildi ki, İlham Əliyevi, N.Paşinyanı, O.Şolts və E.Makronu İspaniyada keçiriləcək növbəti Avropa Siyasi Birliyi sammiti çərçivəsində bir daha dəvət etmək niyətindəyik. Biz əlaqələrin normallaşması istiqamətində yardım etmək, daha çox tərəqqi əldə etmək məqsədilə Aİ tərəfindən hər şeyi edəcəyik”, – deyə Ş.Mişel bəyan edib.