Separatçılar Ağdam-Xankəndi yolu ilə yük qəbul edəcəklər

Azərbaycanın Qarabağdakı erməni sakinlərin ehtiyaclarının qarşılanması üçün təklif etdiyi Ağdam-Xankəndi yolundan istifadə reallığa çevrilib. Rusiya Qırmızı Xaç Cəmiyyətinin göndərdiyi, ancaq Bərdədə gözlədilən ərzaq yükünün ünvanına yola düşməsi bunu deməyə əsas verir. Bundan sonra da Qarabağa qida və digər zəruri mallar bölgənin əsl sahibinin ərazisindən keçməklə göndəriləcək. Bu isə Azərbaycanın dominantlığını, separatçıların isə de-fakto təslim olduqlarını göstərir.

Qarabağdakı ermənilər Rusiyanın yardımını qəbul etsə də, Azərbaycan Qızıl Aypara Cəmiyyəti tərəfindən göndərilən yüklər hələ də Ağdam-Xankəndi yolunda gözləyir. Maraqlıdır, əgər məqsəd ancaq Ermənistan vasitəsilə göndərilən yükləri qəbul etmək idisə, bəs Rusiyanın məhz Azərbaycan ərazisindən göndərdiyi yüklər niyə qəbul edildi? Görünür, separatçılar reallıqla barışsalar da, paralel olaraq revanşist addımlarından da əl çəkmək istəmirlər.

Azərbaycan dəfələrlə Qarabağda yaşayan dinc ermənilərin təhlükəsizliyini öz üzərinə götürməyə hazır olduğunu bəyan edib. Çünki bu ərazi Azərbaycana məxsusdur və oradakı bütün fəaliyyət ancaq Azərbaycan qanunları ilə tənzimlənməlidir. Ermənilərin bu prosesə qarşı çıxması isə sadəcə gülüncdür. Çünki heç kəs rəsmi Bakını iradəsindən döndərmək iqtidarına malik deyil.