Sülhməramlıların missiyası bitdi | Rusiyalı politoloqdan Qarabağ açıqlaması

“Rusiyalı sülhməramlıların Azərbaycan, yəni Qarabağ ərazisindən çıxarılması Rusiya və Ermənistan münasibətlərinin nəticəsi kimi də qiymətləndirilə bilər.

Bu fikrə gəlməkdə iki əsasım var. Birincisi ona görə ki, artıq Qarabağ iqtisadi zonasında ermənilər yoxdur, onlar İrəvana köçürülüb. İkincisi isə ermənilərin Rusiya və hərbçilərə qarşı tətbiq etdiyi sərt qaydalar, lazımsız ifadələr aradakı münasibətlərə pis təsir etdi”.

Bunu Baku TV-yə açıqlamasında rusiyalı politoloq Boqdan Bezpalko deyib.

“Ermənistan hakimiyyəti Rusiyadan, xüsusilə sözügedən ərazidə xidməti borcunu yerinə yetirən hərbçilərdən mümkünsüz istəklərinin həyata keçirilməsini istəyirdi. Məsələn, “Azərbaycan tərəfi ilə münaqişədə bizi dəstəkləyin”, “azərbaycanlılara qarşı müharibədə iştirak edin”.

Qeyd edim ki, Ermənistanla Rusiya arasında münasibətlərin pisləşməsində Qərbin əli və müstəsna rolu var. Baş verənlərin fonunda Ermənistan ərazisindən və 102-ci hərbi Gümrü bazasından rusların sıxışdırılıb çıxarılmasını istisna etmirəm.

Belə halın baş verməməsi üçün Ermənistanın KTMT-də qalmasını təmin etmək lazımdır, amma onlar israrla çıxmaq istəsələr, düşünmürəm ki, kimsə onları məcburən saxlasın”, – politoloq qeyd edib.