Şuşa və Hadruta görə üz-üzə gəldilər: Separatçılar dindirildi

Qarabağdan qovulmuş separatçıların “keçmiş müdafiə naziri” Samvel Babayan noyabrın 29-da Ermənistan parlamentinin 44 günlük müharibə şəraitini araşdıran İstintaq Komissiyasında ifadə verib.

Ölkə mediasının məlumatına görə, o, 3 saata yaxın davam edən dindirmə zamanı separatçı rejimin rəhbərləri əleyhinə danışıb. Belə ki, S.Babayan komissiya üzvlərini inandırmağa çalışıb ki, keçmiş qondarma respublikanın sonuncu “başçısı” Samvel Şahramanyan separatçıların keçmiş “rəhbərləri” vasitəsilə Ermənistanda planlaşdırılmış “hakimiyyət dəyişikliyi”nin həyata keçirilməsinə razılaşıb.

O, keçmiş qondarma respublikanın “dövlət naziri” Qurgen Nersisyanı yalançı, fırıldaqçı və axmaq adlandırıb. Qondarma prokurorluqda dindirildiyi barədə Q.Nersisyanın iddialarını rədd edib.

Q.Nersisyan isə Samvel Babayanın ittihamlarını eşidəndən sonra onu “yalançı” adlandırıb. Qurgen Nersisyan deyib ki, S.Babayan dindirilib və buna dair faktlar var. O, S.Babayanın ifadəsindən diqqət çəkən epizodu da danışıb:

“44 günlük müharibə zamanı o, “təhlükəsizlik şurasının katibi” olub. S.Babayanı dindirməyə çağırmışdıq. Müharibə bitəndən sonra ağlına nə gəldi danışırdı. O, hər şeyə görə günahı başqalarının üzərinə atırdı”.

Q.Nersisyanın sözlərinə görə, separatçıların ordusu uğursuzluğa düçar olubsa, burada Samvel Babayanın da böyük günahı var. O, S.Babayanı Hadrut və Şuşanın itirilməsinə görə də ittiham edib.

Q.Nersisyanın fikrincə, S.Babayan Nikol Paşinyana və Arayik Arutyunyana deyə bilərdi ki, cənub istiqamətində aparılan əməliyyat fəlakətlə nəticələnə bilər, səhvdir, bunu etməyin.

“Bu günə qədər o uğursuz əməliyyata görə heç kim məsuliyyətə cəlb edilməyib”, – deyə Q.Nersisyan fikrini tamamlayıb.