Trampın siyasəti Azərbaycan və digər MDB ölkələrinə necə təsir edəcək?

“ABŞ-nin tətbiq etdiyi tariflərin MDB regionuna birbaşa təsiri elə də yüksək olmayacaq. Çünki bu regiondan ABŞ-yə ixrac məhduddur. Ermənistan və Gürcüstan neft idxal edən ölkələrdir. Neft ixrac edən MDB ölkələrində, məsələn, Azərbaycan və Qazaxıstanda isə bankların neft-qaz sektorunda birbaşa iştirakı aşağı səviyyədə olmaqla bərabər likvidlik buferləri güclüdür”.

Bu barədə “Fitch Ratings” kredit reytinqi agentliyi tərəfindən dərc olunan məqalədə qeyd edilib.

Xarici öhdəlikləri yüksək olan ölkələrdə, xüsusilə Özbəkistanda, dövlət bankları üçün yenidən maliyyələşdirmə daha baha başa gələ bilər. Lakin bu risklər dövlət dəstəyi və güzəştli şərtlərlə beynəlxalq maliyyə institutlarından uzunmüddətli borclarla yumşaldılır.

Məqalədə vurğulanıb ki, ABŞ dolları əsas tarif artımlarından sonra zəifləyib, lakin bu tendensiya dəyişərsə, yüksək dollarlaşma səviyyəsi olan ölkələrdə yerli valyutanın dəyərsizləşməsi aktivlərin keyfiyyətini zəiflədə bilər. Bununla belə, əksər banklar orta səviyyəli itkiləri qarşılamaq qabiliyyətinə malikdir və zərurət yarandıqda hökumətlər yerli valyutanı dəstəkləyə bilər.