Ukrayna Azərbaycan kimi ədalətin bərpa olunmasını istəyir | Ukraynalı deputat
Son günlər Ukrayna ilə Vatikan rəhbəri arasında münasibətlər gərginləşib.
Vəziyyət o həddə çatıb ki, sosial şəbəkələrin Ukrayna seqmentində Papaya qarşı kütləvi etirazlar səslənir. Bunun səbəbi isə Roma Papasının bu günlərdə Ukrayna tərəfinin müharibədə ağ bayraq qaldırma təklifidir.
Kiyev Radasının deputatı Dmitro Belotserkovets bildirib ki, Roma Papası Fransiskin ağ bayraqla bağlı açıqlaması təəssüf ki, həm ukraynalılar, həm də demokratik dünya insanları arasında çaşqınlıq və mənfi emosiyalara səbəb olan ilk belə bəyanat deyil. Amma Ukrayna yalnız bir şey – Azərbaycan kimi ədalətin bərqərar olmasını istəyir. Lakin buna nail olmaq üçün mübarizə aparmaq lazımdır.
"Təəssüf ki, Vatikan səhvlərini düzəltməyə çalışmır. Axı bu, Roma Papasının Kremlin demokratik dünyaya qarşı istifadə etdiyi ilk bəyanatı deyil. Əminəm ki, belə halları düzəltmək olar. Bəlkə də Roma Papası Fransisk həqiqətən də Rusiya təbliğat maşınının təqdim etdiyi kimi düşünmür. Bu açıqlamadan bir gün sonra Vatikanın bu fikirləri necə şərh etdiyini gördük. Amma səhvlər üzərində işləmək lazımdır.
Bir sözlə, böyük tarixə malik Vatikan tarixin dərslərini, ədalət uğrunda mübarizə aparmağın nə demək olduğunu unutmamalıdır. Axı ukraynalılar mübarizəni davam etdirirlər və hər gün hərbçilərimiz həyatını itirir, dinc vətəndaşlarımız demokratik dünyanın, o cümlədən Vatikanın maraqlarını müdafiə edərək ölürlər. Ümid edirəm ki, biz bundan sonra ilk növbədə yalnız ədaləti, sülhü müdafiə edəcək Roma Papasını görəcəyik", – deyə o əlavə edib.
![icon](/images/loading.png)