Vardan Qukasyan Rusiya sülhməramlılarını onları "qorumamaqda" günahlandırıb

Rusiyaya qarşı sərt çıxışları ilə tanınan erməni fəal Vardan Qukasyan növbəti dəfə Rusiya sülhməramlılarını təhqir edib.

O, şəxsi “Youtube” kanalında paylaşdığı videoda sülhməramlıları guya aclıqdan əziyyət çəkən Qarabağ ermənilərini qorumamaqda ittiham edib.

“Məni qorumaq üçün göndərilmiş hərbçilər burada gündə 4 dəfə qidalanırlar, amma məni qorumurlar. Mən onları başa düşə bilmirəm! Bütün gün yemək yeyirlər, darvazanın bu tərəfində olan ermənilərin ac olmalarına isə göz yumurlar. Hansı sülhməramlı kontingentdən söhbət gedə bilər? Əşyalarınızı toplayın və rədd olun buralardan!”, – deyə erməni fəal bildirib.

Məsələni şərh edən rusiyalı politoloq Sergey Markov bildirib ki, ermənilər məqsədlərinə çatmaq üçün hər yola əl atırlar: “Ermənistan hakimiyyəti artıq dərk edib ki, Qarabağ Azərbaycana məxsusdur və tamamilə Azərbaycanın nəzarəti altına keçməlidir. Hazırda onları qıcıqlandıran bir neçə məqam var, ərazidən çıxmaq istəmirlər çünki bilirlər ki, onları Ermənistanda heç də yaxşı günlər gözləmir. Qarabağda qalmaq istəyirlər, lakin Azərbaycan vətəndaşlığını qəbul etmək istəmirlər. Onlar səs-küy salmaqla Fransanı və Avropa İttifaqını əraziyə cəlb etmək istəyirlər. Elə bilirlər ki, onlar Ermənistana kömək edə biləcəklər. Bütün bunların fonunda həm də başa düşürlər ki, 3-cü Qarabağ müharibəsi başlasa bu, ermənilərin sonu demək olacaq. Özlərinin Azərbaycana cavab verməyə gücləri çatmadığı üçün Rusiya sülhməramlılarından istifadə etmək istəyirlər. Nə Rusiya Prezidenti Vladimir Putin, nə də sülhməramlılar onların əvəzinə vuruşmaq istəyir. Ermənilər başa düşürlər ki, Rusiya daha onlara kömək etməyəcək, ona görə də artıq təhqirə keçiblər”.

S.Markov həmçinin qeyd edib ki, Ermənistan illərdir dəstək aldığı Rusiyadan üz döndərərək Fransa ilə yaxınlıq etməyə başlayıb, lakin rəsmi Parisdən hələ də ciddi yardım ala bilməyib.