Zakir Həsənov və Azərbaycan XİN təyyarə qəzasına görə Türkiyəyə başsağlığı verdi

Prezident İlham Əliyevin tapşırığına əsasən, Baş nazir Əli Əsədov Türkiyə Hərbi Hava Qüvvələrinə məxsus hərbi yük təyyarəsinin Gürcüstan ərazisində qəzaya uğraması ilə əlaqədar Gürcüstanın Baş naziri İrakli Kobaxidze ilə əlaqə saxlayıb.

Baş nazir Əli Əsədov ölkəmizin qəzanın nəticələrinin aradan qaldırılması, axtarış və xilasetmə tədbirlərinin həyata keçirilməsi üçün bütün lazımi dəstəyi göstərməyə, həmçinin Azərbaycan Fövqəladə Hallar Nazirliyinin müvafiq heyətini həmin əraziyə göndərməyə hazır olduğunu bildirib.

Gürcüstan tərəfi bu dəstəyə görə təşəkkürünü bildirib. Hazırda Gürcüstanın aidiyyəti qurumlarının nümayəndələrinin ərazidə çalışdığı qeyd edilib.

Söhbət zamanı Azərbaycanın Fövqəladə Hallar Nazirliyinin və Rəqəmsal İnkişaf və Nəqliyyat Nazirliyinin gürcüstanlı həmkarları ilə təmasda olduqları vurğulanıb. Tərəflər faciə ilə əlaqədar təmasların davam etdirilməsini razılaşdırıb.

Qeyd edək ki, müdafiə naziri Zakir Həsənov təyyarə qəzası ilə bağlı Türkiyənin milli müdafiə naziri Yaşar Gülerə başsağlığı verib.

Bu barədə Müdafiə Nazirliyindən məlumat verilib.

"Azərbaycandan Türkiyəyə yola düşən "C-130" hərbi yük təyyarəsinin Gürcüstan-Azərbaycan sərhədində qəzaya uğraması xəbəri məni dərindən kədərləndirdi. Həlak olan hərbi qulluqçulara Allahdan rəhmət diləyir, yaxınlarının dərdlərinə şərik olur, ailələrinə dərin hüznlə başsağlığı verirəm", – deyə başsağlığında qeyd edilib.

Xarici İşlər Nazirliyi də təyyarə qəzası ilə əlaqədar Türkiyəyə başsağlığı verib.

Bu barədə Nazirliyin "X" hesabında paylaşım edilib.

"Azərbaycandan Türkiyəyə istiqamətlənən qardaş Türkiyəyə məxsus "C-130" tipli hərbi nəqliyyat təyyarəsinin Gürcüstan ərazisində qəzaya uğraması xəbəri bizi dərindən sarsıtdı. Bu ağır itki ilə əlaqədar qardaş Türkiyə xalqına və Silahlı Qüvvələrinə dərin hüznlə başsağlığı verir, həlak olanların ailələrinə səbir diləyirik", – məlumatda qeyd olunub.