Ağstafalı atlet Ulu Öndərin 100 illiyinə marafon həsr edib

Ağstafa rayonunun Həsənsu kənd sakini olan atlet 34 yaşlı Ağa Əliyev ümummilli lider Heydər Əliyevin 100 illik yubileyi ilə əlaqədar marafon yürüşünə başlayıb.

O, 466 kilometrlik məsafəni 5 günə qət etməyi və bununla da rekord qırmağı hədəfləyib. Ağstafa şəhərindəki Heydər Əliyev Mərkəzindən start götürən yürüşün paytaxtda tamamlanacağı planlaşdırılır.

Yürüş Gənclər və İdman Nazirliyi, eləcə də Azərbaycan Atletika Federasiyası tərəfindən təşkil olunub. Yürüşdən əvvəl atlet həkim nəzarətindən keçərək yola düzəlib. Yürüş boyu idmançını təcili tibbi yardım briqadası və yol polisləri də müşayiət edəcək.

20 ildir yüngül atletika ilə məşğul olduğunu deyən Ağa Əliyev təxminən 1 saat müddətində Tovuz rayonuna çatıb.

Gündüzlər yürüşünü davam etdirən idmançı gecələr yolustü hotellərdə dincəlir. 5 günün tamamında isə o, Fəxri xiyabanda yürüşünü tamamlamalıdır.