Alimlər körpələrlə bağlı qəribə araşdırma etdi | Valideynlərin nəzərinə

Kornell Universitetinin tədqiqatçıları belə nəticəyə gəliblər ki, körpələr sadəcə olaraq dil öyrənmir, həm də fəal şəkildə prosesi xeyli asanlaşdırırlar.

Belə ki, valideynlər və qayğı göstərənlər intuitiv olaraq cümləni qısaldır və körpələrin danışmaq cəhdlərinə cavab verərkən daha sadə sözlərdən istifadə edirlər. Bu şüursuz davranış nitqin əldə edilməsində əsas rol oynayan əks-əlaqə yaradır. Psixoloqlar bunu sadələşdirmə effekti adlandırırlar.

Professor Maykl Qoldşteyn bildirib ki, bu, körpələrə onların inkişaf səviyyəsinə uyğun məlumat verən bir vasitədir.

Alimlər qrupu 13 dildə valideynlər və uşaqlar arasında ünsiyyətin 1500-dən çox stenoqramını təhlil edib. Tədqiqat təhsil və sosial proqramlara təsir göstərə bilər və sadəcə olaraq valideynlərə daha çox danışmağı tövsiyə etmək əvəzinə, tədqiqatçılar ünsiyyətin keyfiyyətinə və vaxtına diqqət yetirməyi təklif edirlər.

M.Qoldşteyn əlavə edib ki, əhəmiyyətli olan təkcə sözlərin sayı deyil, böyüklərin uşağın danışma cəhdlərinə necə və nə vaxt reaksiya verməsidir. Körpələr söhbətləri idarə edə bilirlər və valideynlərin onların danışmaq cəhdlərinə tez cavab verməsi vacibdir.