Arıçılıqda xəstəliklərin yayılma səbəbləri açıqlandı | Göygöl

Son vaxtlar arılar arasında müxtəlif yoluxucu xəstəliklər yayılıb.

Fermerlər deyirlər ki, bu il arı xəstəliklərinin daha geniş yayılmasının səbəbi əsasən iqlim dəyişkənliyidir.

Ancaq arı ailələrinin məhv olmasının başqa səbəbləri də var. Belə ki, yeni fermerlər tərəfindən gətirilən arı koloniyaları bəzi hallarda özləri ilə gətirdikləri xəstəlikləri köhnə təsərrüfatlara da yaya bilirlər.

Arıçılıq üzrə mütəxəssis Fariz Salmanov bildirib ki, qeyri-peşəkar arıçılar arılara mövsümi qulluğu vaxtında etmədiklərinə görə arılar müxtəlif xəstəliklərə yoluxur. O həmçinin qeyd edib ki, Dövlət Məşğulluq Agentliyindən bəzi hallarda təsərrüfatçılara qoca, xəstə arılar verilib. Bu isə digər təsərrüfatlarda da xəstəliklərin yayılmasına şərait yaradıb.

Dövlət Məşğulluq Agentliyindən məsələ ilə bağlı bildirilib ki, layihə çərçivəsində fermerlərə verilən arıların sağlamlığı yoxlanılır və müvafiq təlimatlandırma işləri aparılır. Verilən arı ailələrinin sağlamlığı ilə bağlı məsələyə gəlincə isə bununla bağlı indiyədək hansısa şikayət daxil olmayıb.