Özbəkistandan Azərbaycana təhlükəli arılar gətirilib? - Baku TV

"Özbəkistandan Azərbaycana bir TIR gənələrlə yoluxmuş arı gətirilib".

Bunu Azərbaycan Arıçılar Assosiasiyasının sədri Bədrəddin Həsrətov deyib.

Onun sözlərinə görə, Özbəkistandan Azərbaycana arı ailələri idxal edilib ki, onlar "Tropilaelaps" gənəsi ilə yoluxmuş olub.

Ölkəyə gətirilən bu təhlükəli arıların fermerlərə satıldığı iddia olunur. Fermerlər bildirirlər ki, əgər bunun qarşısı alınmasa, təsərrüfatlara çox böyük ziyan dəyəcək.

Bədrəddin Həsrətov vurğulayıb ki, Özbəkistan Rusiyaya külli miqdarda arı ixrac etsə də, "Tropilaelaps" gənəsinin kütləvi yayılması səbəbindən Rusiya tərəfi bu idxaldan imtina edib. Nəticədə, Özbəkistan ixracatçıları yeni satış bazarları axtararaq Azərbaycan bazarına daxil olublar.

O həmçinin qeyd edib ki, Azərbaycan Qida Təhlükəsizliyi Agentliyi (AQTA) arıları təqdim olunan sənədlərə əsaslanaraq ölkəyə buraxıb, onlar tək-tək yoxlanılmayıb:

"Sözügedən arılar şanlarda gətirilib. Bu da xəstəliyin yayılma riskini qat-qat artırır".

Məsələ ilə bağlı AQTA-dan bildirilib ki, sosial şəbəkələrdə yayılan görüntülərdən məlumatlıdırlar. Hazırda məsələ ilə bağlı müvafiq araşdırmalar aparılır.

Onu da bildirək ki, bu gənələr arı sürfələri ilə qidalanır. Nəticədə, arılar deformasiyaya uğrayır, viruslar yayılır, arı ailələri sürətlə zəifləyir və məhvə doğru gedir.