Astarada mərkəzi bazarda hansı nöqsanlar aşkarlandı? | FHN-dən açıqlama

Fövqəladə Hallar Nazirliyinin Dövlət Yanğın Nəzarəti Xidməti səlahiyyətlərinə uyğun olaraq ölkə ərazisində yanğın təhlükəsizliyinin təmin edilməsi məqsədilə zəruri tədbirlərin görülməsini davam etdirir.

FHN-dən verilən məlumata görə, bu çərçivədə Dövlət Yanğın Nəzarəti Xidməti tərəfindən Astara şəhərində yerləşən Rauf Həziyevə məxsus Astara Mərkəzi Bazarında yoxlama zamanı yanğın təhlükəsizliyi sahəsində çoxsaylı nöqsanların mövcud olduğu, həmin nöqsanların insan həyatı və ya sağlamlığına, ətraf mühitə və dövlətin əmlak maraqlarına birbaşa təhlükə yaratdığı müəyyən edilib.

Belə ki, bazarın dam örtüyünün taxta konstruksiyaları odadavamlı məhlulla hopdurulmayıb. Bazardakı tikililərin daxilində təşkil olunmuş satış sahələri yanar konstruksiyalarla quraşdırılıb və tavanları polietilen və tezalışan sintetik materiallarla üzlənib.

Bundan əlavə, bazarın ərazisində yanğına qarşı su hovuzu və daxili yanğın kranlarının mövcud olmaması və bazarın ilkin odsöndürən alət və avadanlıqlarla tam təmin olunmadığı aşkar edilib.

Qeyd olunanları nəzərə alaraq yanğın təhlükəsizliyi norma və qaydalarının tələblərinin kobud pozulması faktları aşkar edildiyindən Astara Mərkəzi Bazarının fəaliyyətinin qismən dayandırılması barədə qərar qəbul olunub.