Azad edilən ərazilərdə enerji sistemi necə yenilənəcək? - Layihələrin detalları - Baku TV

İşğaldan azad olunan ərazilərdə enerji infrastrukturunun bərpası və müasirləşdirilməsi istiqamətində həyata keçirilən layihələr davam edir.

Bu çərçivədə "AzərEnerji" ASC tərəfindən Xankəndi şəhərində 110 kilovoltluq "Xankəndi-2", Ağdərə rayonunda isə 110 kilovoltluq "Həsənriz" yarımstansiyaları sökülərək ən müasir rəqəmsal texnologiyalar əsasında yenidən inşa olunur.

"Xankəndi-2" yarımstansiyasının tikintisi Xankəndi şəhərinin, ətraf yaşayış məntəqələrinin və mühüm infrastruktur obyektlərinin daha etibarlı, dayanıqlı və keyfiyyətli elektrik enerjisi ilə təmin edilməsinə imkan yaradacaq.

"Həsənriz" yarımstansiyası isə Ağdərə rayonunun istehlakçılarının, o cümlədən sənaye müəssisələrinin enerji təchizatının etibarlılığını artırmaqla yanaşı, Sərsəng və bölgədə fəaliyyət göstərən digər su elektrik stansiyalarında istehsal olunan enerjinin ölkənin vahid enerji sisteminə təhlükəsiz və fasiləsiz ötürülməsini təmin edəcək.

Layihələrin başa çatdırılması ilə "AzərEnerji"nin işğaldan azad olunmuş ərazilərdə inşa etdiyi yarımstansiyaların sayı 16-ya çatacaq. Bununla yanaşı, bölgədə artıq 38 su elektrik stansiyası tikilərək istismara verilib. Hazırda isə daha 8 su elektrik stansiyasının tikintisi davam etdirilir.