Azad Xankəndidə ilk dünyaya gələn uşağın ailəsi sevinc içində

Aprelin 23-də işğaldan azad edilmiş Xankəndidə ilk körpə dünyaya gəlib.

Səadət Namazlı və Abbas Abdullayevin ilk övladı olan körpə Xankəndi şəhərindəki tibb müəssisəsində doğulub.

Baku TV-yə danışan körpənin atası çox sevincli olduğunu bildirib:

“Sevinirəm ki, uğrunda şəhidlər verdiyimiz torpaqda uzun illərdən sonra Azərbaycan qeydiyyatında olan oğlan yaşayacaq. Ordu sıralarında bir əsgər də artdı. Qalib ordunun, qalib xalqın bir nümayəndəsi də artdı”.

A.Abdullayev deyib ki, artıq körpənin adını da seçiblər:

“Biz Xankəndidə dünyaya gələn ilk oğlan uşağının adının İlham olmasını düşünürük. Çünki bizi qələbəyə aparan Sərkərdə o insandır. Allah nəsib etsin, Prezidentimiz kimi xalqına, dövlətinə layiqli bir insan olsun”.