AZAL faciəvi təyyarə qəzasına görə sığorta ödənişi aldı

Rusiyanın “AlfaSığorta” şirkəti AZAL-ın Qazaxıstanın Aktau şəhəri yaxınlığında qəzaya uğramış “Embraer 190” markalı sərnişin təyyarəsinə görə tam sığorta ödənişini edib.

Bu barədə “İnterfaks”a “AlfaSığorta”nın baş direktorunun aviasiya və kosmik sığorta üzrə müavini İlya Kabaçnik məlumat verib.

“Həm təyyarə, həm də daşıyıcının sərnişinlər qarşısında məsuliyyəti “AlfaSığorta”da sığortalanmışdı. Riskin əsas hissəsi “Rusiya Milli Təkrarsığorta Şirkəti”nə təkrar sığortaya yönəldilmişdi. Tam sığorta ödənişi fevralda həyata keçirilib”, ‒ deyə İlya Kabaçnik qeyd edib.

Bununla belə, baş direktorun müavini kompensasiyanın məbləğini açıqlamayıb.

O, sığortaçının aviasiya hadisəsinin rəsmi araşdırılmasının başa çatmasını gözləməməsinin səbəbini də izah edib.

“Qəzanın araşdırılması davam etsə də, ödənişlərin təşkili üçün kifayət qədər məlumatımız var. Sığortaçı kimi bizim üçün təyyarənin məhv olması faktı vacibdir. Müharibə və terror riskləri də sığortalandığı üçün aviaşirkət istənilən halda kompensasiya alır”, ‒ deyə “AlfaSığorta"nın baş direktorunun müavini İlya Kabaçnik qeyd edib.