Azər Maqsudov zərərçəkənlə barışmayıb? | Məhkəmə prosesi

Bakıda türkoloq alim Arif Acaloğlunu avtomobillə vurub öldürməkdə təqsirləndirilən tanınmış həkim, baş toksikoloq Azər Maqsudovun cinayət işi üzrə məhkəmənin növbəti prosesi keçirilib.

Sabunçu Rayon Məhkəməsində hakim Teymur Həsənovun sədrliyi ilə baş tutan prosesdə hadisə ilə bağlı rəy verən Ədliyyə Nazirliyinin Məhkəmə Ekspertiza Mərkəzinin ekspertləri Təhmasib Bağırov və Lətif Əliyevin ifadəsi dinlənilib.

Ekspertlər öz növbəsində hadisə ilə bağlı verdikləri rəydə hər hansı bir ziddiyətin olmadığını bildiriblər.

Daha sonra prosesdə təqsirləndirilən Azər Maqsudov ona qarşı qaldırılan mülki iddiaya münasibət bildirərək vurğulayıb ki, daha əvvəl mərhumun böyük qardaşı ilə danışaraq ortaq məxrəcə gəliblər. Lakin sonradan həmin şəxsin həyat yoldaşı Türkiyədən zəng edərək razılaşmadıqlarını bildirib.

Azər Maqsudovun sözlərinə görə, qəza zamanı həyatını itirən Arif Acaloğlunun yaxınları ondan Bakıda iki ədəd ikiotaqlı ev istəyiblər. Qarşı tərəfin həkimə qarşı mülki iddiası 400 min manat olsa da, tərəflərin danışıqlarından sonra bu rəqəm 250 min manatadək endirilib. Buna baxmayaraq, cavabdeh olan Azər Maqsudov zərərçəkən tərəfə yalnız 45 min manat ödəmək iqtidarında olduğunu bildirib.

Zərərçəkən tərəfin vəkilləri əlavə ediblər ki, hazırda qarşı tərəflə barışıq əldə olunmayıb.

Hakim məhkəmə istintaqının yekunlaşdığını elan edib. Dövlət ittihamçısı isə çıxış üçün vaxt istəyib.