Məşhur həkim Azər Maqsudovun törətdiyi qəzanın təfərrüatı

Bakıda türkoloq alim Arif Acaloğlunu avtomobillə vurub öldürməkdə təqsirləndirilən tanınmış həkim, baş toksikoloq Azər Maqsudovun cinayət işi üzrə növbəti məhkəmə prosesi keçirilib.

Sabunçu Rayon Məhkəməsinin hakimi Anar Rzayevin sədrliyi ilə keçirilən prosesdə şahid qismində təqsirləndirilən həkimin həyat yoldaşı Günay Maqsudovanın ifadəsi dinlənilib. O, ifadəsində həyat yoldaşının günahsız olduğuna əmin olduğunu vurğulayaraq bir neçə ildir ki, həmin yolla ailəsi ilə birlikdə təhlükəsiz, qəzasız getdiyini deyib. Hadisə baş verən gün isə özü ilə yanaşı, qızı da avtomobildə olub. Sabunçu-Zabrat istiqamətində hərəkətdə olarkən qəfil sağ tərəfdən eşidilən zərbə səsi onları avtomobili saxlamağa məcbur edib. Avtomobildən düşdükdən sonra zərbədən kiminsə yıxıldığını görüblər. Bundan sonra Azər Maqsudov avtomobildə yer olmadığı üçün qızını hadisə yerində qoyaraq həyat yoldaşı Günay Maqsudova ilə birgə yaralını Sabunçudakı 3 saylı Şəhər Kliniki Xəstəxanasına çatdırıblar. Hadisə nəticəsində ağır xəsarət alan türkoloq alim Arif Acaloğlu xəstəxanada dünyasını dəyişib.

Cinayət işinin ibtidai istintaq zamanı həyata keçirilən müəyyən prossesual hərəkətlər barədə yaranan sualları cavablandırmaq üçün cinayət işi icraatında iştirak edən Sabunçu Rayon Polis İdarəsinin müstəntiqi Samir Kərimov prosesə dəvət olunaraq müəyyən qaranlıq məqamlara aydınlıq gətirib.

Növbəti proses noyabrın 7-nə təyin olunub.