Həkim Azər Maqsudovun məhkəməsi keçirildi

Bakıda türkoloq alim Arif Acaloğlunu avtomobillə vurub öldürməkdə təqsirləndirilən tanınmış həkim, baş toksikoloq Azər Maqsudovun cinayət işi üzrə məhkəmə prosesi başlayıb.

Sabunçu Rayon Məhkəməsinin hakimi Anar Rzayevin sədrliyi ilə keçirilən iclasda təqsirləndirilən Azər Maqsudovun anket məlumatları dəqiqləşdirildikdən sonra zərərçəkənin hüquqi varisinin vəkilləri məhkəməyə baş toksikoloqa qarşı 400 min manatlıq mülki iddia və əmlakına həbs qoyulması ilə bağlı vəsatət təqdim edib.

Qısa müşavirədən sonra məhkəmə zərərçəkmişin vəkillərinin vəsatətləri ilə bağlı qərar qəbul edib. Vərəsələrə zərər ödənilmədiyindən verilmiş mülki iddia icraata qəbul edilsə də, təqsirləndirilən şəxsin əmlakına həbs qoyulması ilə bağlı vəsatət təmin edilməyib.

Məhkəmənin növbəti iclası iyulun 4-nə təyin edilib.

Qeyd edək ki, hadisə 2023-cü il noyabrın 15-də paytaxtın Sabunçu rayonu ərazisində qeydə alınıb. Paytaxt sakini Azər Maqsudov idarə etdiyi “Mercedes” markalı avtomobillə yolu keçən 1956-cı il təvəllüdlü Arif Acaloğlunu vurub. O, xəstəxanaya yerləşdirilsə də, həyatını xilas etmək mümkün olmayıb. Hadisəni törətməkdə təqsirləndirilən Kliniki Tibbi Mərkəzin Toksikologiya şöbəsinin müdiri Azər Maqsudova qarşı Cinayət Məcəlləsinin yol hərəkəti və ya nəqliyyat vasitəsinin istismarı qaydalarının pozulması – ölümlə nəticələndikdə maddəsi ilə ittiham irəli sürülüb.