Azərbaycanın enerji infrastrukturuna yönəlmiş zərbə

2020-ci ilin iyul ayı… Azərbaycanın qərbində düşmənin qarşısında sipər olan Tovuz rayonu. Burada evlərin pəncərəsi səngərə açılırdı. Ordu kürəyini xalqa yaslayıb düşmənlə üz-üzə dayanmışdı. 12 iyul gecəsi atəş səsləri sükutu yarıb keçdi.

Ermənistan ordusu ilk olaraq Tovuzun Ağdam kəndi istiqamətində mövqelərimizi hədəf aldı. Bu, sadə bir post hücumu deyildi. Azərbaycanın enerji və nəqliyyat arteriyalarına yönəlmiş açıq təxribat idi. Bu zərbəyə ilk cavabı elə səngərdəki əsgərimiz verdi. Cəbhə alovlandı.

Sonrakı günlərdə cəbhədə döyüşlər daha da şiddətləndi. Səngərlərdə əsgərlərin mübarizəsi, evlərdə anaların duaları dayanmırdı. Hər atəş səsi Tovuzdan Bakıya qədər çatırdı. Ön cəbhə ilə arxa cəbhə bir yumruq kimi birləşdi.

14 iyul – bu tarix artıq təkcə təqvimdə bir gün deyil. Bu, bir millətin beynəlxalq ədalətə olan polad inamının qırıldığı, general-mayor Həşimovun şəhadətə ucaldığı məqamdır. Cəbhədə sıravi əsgərlə çiyin-çiyinə döyüşən generalın şəhid olma xəbəri bütün ölkəni sarsıtdı. Minlərlə insan Bakı küçələrində gecə ilə yürüşə çıxdı.

Tovuz qısa zamanda xalqın iradəsi ilə ordunun cəbbəxanası arasında qurulan səngərə çevrildi. Bütün hücumlar geri qaytarıldı. Üstümüzə tuşlanan hər silaha, atılan hər mərmiyə cavab verildi. Tovuz döyüşləri tarixdə bir cəbhə oldu.