Azərbaycanın Tehrandakı səfirliyinə terror hücumundan iki il ötür

Azərbaycanın İrandakı səfirliyinə terror hücumundan 2 il ötür.

2023-cü il yanvarın 27-də səhər saatlarında ölkəmizin İranın paytaxtı Tehrandakı səfirliyinə silahlı hücum olub.

Hücum edən şəxs “Kalaşnikov” markalı avtomat silahla mühafizə postunu yararaq mühafizə xidmətinin rəisi Orxan Əsgərovu qətlə yetirib. Səfirliyin mühafizə xidmətinin iki əməkdaşı – Vasif Tağıyev və Mahir İmanov hücumun qarşısını alarkən yaralanıblar.

Orxan Əsgərov 2-ci Şəhidlər xiyabanında dəfn edilib. O, 2023-cü il fevralın 3-də ölümündən sonra “Vətən uğrunda” medalı ilə təltif edilib.

Vasif Tağıyev 1-ci dərəcəli “Rəşadət” ordeni ilə, Mahir İmanov isə “Vətən uğrunda” medalı ilə təltif edilib. Terror aktını törədən Yasin Hüseynzadə saxlanılıb. Hadisədən sonra Azərbaycanın Tehrandakı səfirliyinin fəaliyyəti dayandırılıb. Səfirliyin əməkdaşları 2023-cü il yanvarın 29-da Tehrandan Bakıya təxliyə olunub. Səfirlik əməkdaşları və onların ailə üzvlərindən ibarət ümumilikdə 53 nəfər Vətənə qayıdıb.

Azərbaycanla İran arasında aparılmış danışıqlardan sonra 2024-cü il iyulun 15-dən etibarən Azərbaycanın İrandakı səfirliyi yeni ünvanda fəaliyyətini bərpa edib. Səfir və səfirliyin hazırkı heyəti İrana geri dönüb.

Ölkəmizin İrandakı səfirliyinə hücum edən Yasin Hüseynzadənin 2 il ərzində məhkəməsi keçirilib. İran Ali Məhkəməsi onunla bağlı ölüm hökmünü təsdiqləyib və iş Tehrana cinayət hökmlərinin icrasına göndərilib.