Bakıda Beynəlxalq Avtomobil Federasiyasının mükafatlandırma məsimi keçiriləcək

Məşhur ifaçılar Prize Giving Bakı şousunda çıxış edəcəklər.

Dekabrın 8-də Bakıda ilk dəfə keçiriləcək Beynəlxalq Avtomobil Federasiyasının Mükafatlandırma mərasiminin bədii proqramı qonaqlara və yayım izləyicilərinə möhtəşəm anlar yaşadacaq.

Azərbaycan Avtomobil Federasiyasının baş tərəfdaşlığı ilə keçiriləcək Mükafatlandırma mərasimi maraqlı səhnə təqdimatı ilə yadda qalacaq.

2011-ci ildən keçirilən Prize Giving mərasiminin unudulmaz 3 hissəli Bakı şousu “FIA Odlar Yurdunda” təqdimatı ilə başlayacaq.

Tamaşaçılarla interaktiv dialoq formatında qurulacaq proqram mədəniyyətlərarası dialoqun vacibliyi ilə bağlı bir mesaj da olacaq. Belə ki, təqdimatda səslənəcək müxtəlif janrlara aid musiqinin sintezi ilə bir daha müxtəlifliyin, Şərqlə Qərb arasındakı harmoniyanın önəmi ismarıcı ötürüləcək.

İdman sahəsində ilin ən möhtəşəm hadisələrindən sayılan FIA Mükafatlandırma mərasimi FIA Baş Assambleyasının yekununda təşkil olunur və tədbirdə avtomobil idmanı üzrə müxtəlif nominasiyalarda mükafatlar təqdim edilir.