Bakıda kirayə qiymətləri son bir ildə niyə bu qədər artıb? - Baku TV

Daşınmaz əmlak bazarında davam edən bahalaşma yaşayış sahələrinin kirayə qiymətlərində vəziyyəti aktuallaşdırır.

Rəsmi statistikaya görə, 2025-ci ildə ölkədə mənzillərin qiyməti orta hesabla 12,2 faiz artıb.

Rieltorların sözlərinə görə, evlərin bahalaşmasının fonunda kirayə qiymətləri də sabit qalmayıb: “Keçən il 450 manata olan ev indi 700 manatdır”.

Azərbaycan Qiymətləndiricilər Cəmiyyətinin sədri Vüqar Orucun sözlərinə görə, kirayə bazarındakı artım tempi daşınmaz əmlak qiymətləri ilə düz mütənasibdir. Yəni kirayə qiymətlərinin artımı evlərin, evlərin bahalaşması isə kirayə qiymətlərinin yüksəlməsinə səbəb olur.

Bundan başqa, iqtisadi proseslər də kirayə bazarına təsir edir. Vüqar Oruc deyir ki, inflyasiya və əhalinin şəhərə üz tutması qiymətlərə təsirsiz ötüşmür.

Müşahidələr göstərir ki, ölkədə yaşayış sahələrinin kirayəsi əksər hallarda müqavilə bağlanmadan, tərəflər arasında şifahi razılaşma əsasında həyata keçirilir. Bu da kirayə qiymətlərindəki artımda subyektiv amillərin rolunu istisna etmir.

Eyni zamanda onu da vurğulamaq lazımdır ki, kirayə xidməti, qiyməti dövlət tərəfindən tənzimlənən xidmətlərə aid deyil.