Bayrağımızın Laçın şəhərində dalğalandığı gün

Azərbaycanda ilk dəfədir ki, Laçın şəhəri günü qeyd olunur.

Belə ki, Laçın şəhəri günü Prezident İlham Əliyevin ötən ay imzaladığı Sərəncama uyğun olaraq hər il 26 avqust tarixində təntənəli şəkildə qeyd edilir.

Əlamətdar günün bu tarixdə qeyd olunması Azərbaycan Ordusunun Laçın şəhərində ötən ilin avqustun 26-da yerləşməsi ilə əlaqədardır. Həmin gün Prezident İlham Əliyev azərbaycanlıların Laçın şəhərinə qayıtması ilə bağlı müjdəli xəbəri sosial şəbəkə hesabında elan edib.

Dövlət başçısının ötən ilin bu gün paylaşdığı mətndə deyilir:

“Bu gün, avqustun 26-da biz –azərbaycanlılar Laçın şəhərinə qayıtmışıq. Azərbaycan Ordusu Laçın şəhərinə yerləşdi. Zabux və Sus kəndləri nəzarətə götürüldü. Bütün laçınlıları və Azərbaycan xalqını bu münasibətlə təbrik edirəm. Yaşasın Laçın! Yaşasın Azərbaycan!”.

Qeyd edək ki, artıq bir ildir ki, Laçın şəhərinin mərkəzində Azərbaycanın şanlı 3 rəngli Dövlət Bayrağı dalğalanır.