Binanı özəlləşdirib, sakini döyən Hacı Mazanla bağlı məhkəmə qərarı

Bir neçə ay əvvəl “Hacı Mazan” ləqəbli iş adamı Ramazan Zeynalovun yaşadığı binada lifti özələşdirməsi ilə bağlı çəkiliş etmişdik. İş adamının çoxmərtəbəli yaşayış binasının liftinə kod qoyduraraq, yalnız ailə üzvlərinin istifadəsinə icazə verməsi sakinlərin ciddi narazılığına səbəb olmuşdu.

Məsələ məhkəmədə araşdırılıb. Nəticə olaraq, iş adamı uduzub. Nəsimi Rayon Məhkəməsi onun “lift əməliyyatı”nın qanunsuz olduğu barədə qərar qəbul edib.

Məhkəmə Nəsimi rayonu, Şövqiyar Abdullayev küçəsi, ev 23 ünvanındakı binada Ramazan Zeynalovun digər sahə mülkiyyətçilərinin ümumi əmlakı olan liftdən istifadəsinə yaratmış olduğu bütün qadağa və maneələrin qeyri-qanuni olduğu qənaətinə gəlib. Qərarda tələb olunur ki, Hacı Mazanın liftə tətbiq etdiyi kilid sistemi dərhal ləğv edilməlidir.

Xatırladaq ki, liftə tətbiq edilən məhdudiyyətlə yanaşı, iş adamının beş mənzilinin və mansardın işıq pulunu, kommunal xərclərini bina sakinlərinin hesabına ödətməsi, mənzillərinə qanunsuz işıq xətləri çəkdirməsi, eyni zamanda mənzil satdığı şəxsin evinə hücum etməsi, onu döyməsi də böyük səs-küy yaratmışdı.