Biz anladıq ki, ABŞ beynəlxalq sülh gündəminə tam sadiqdir | Hikmət Hacıyev - Baku TV

“ABŞ Prezidenti Donald Trampın rolu fundamental idi, bu, Azərbaycan-Ermənistan sülh prosesində dönüş nöqtəsi oldu”.

Bunu Qətərdə keçirilən Doha Forumunda Prezidentin köməkçisi Hikmət Hacıyev deyib.

“Azərbaycan və Ermənistan son beş ildə sülh gündəliyi üzərində çalışırdı. Mən də erməni həmkarımla çoxsaylı görüşlərdə iştirak etmişəm. Bəli, bəzən müzakirələr çətin idi, razılaşmadığımız məqamlar olurdu. Amma Azərbaycan təşəbbüs göstərdi və masa üzərinə real sülh sazişi mətni və sülhün beş əsas prinsipini qoydu. Prezident Trampın və onun komandasının prosesə daxil olması ilə biz anladıq ki, ABŞ beynəlxalq sülh gündəminə tam sadiqdir. Biz də sülhün geri dönməz olması üçün ABŞ-nin güclü siyasi çəkisinə və təminatına ehtiyac duyurduq.

Fevraldan başlayaraq ABŞ ilə intensiv təmaslara başladıq. ABŞ həm Ermənistan, həm Azərbaycanla paralel işləməyə başladı. Sonra bütün proseslər birləşdi və nəticə verdi. Vaşinqtondan əvvəl Əbu-Dabi görüşü oldu, bu, beş saatdan çox davam etdi. Biz orada Vaşinqton prosesinin əsas çərçivələrini razılaşdırdıq. Prezident D.Trampın fundamental rolu Azərbaycan-Ermənistan sülh prosesində dönüş nöqtəsi oldu”, – deyə Hikmət Hacıyev qeyd edib.