“Burada neandertal insanlar yaşayıb” - GÖR NƏLƏRİ QAYTARMIŞIQ!

“Gör nələri qaytarmışıq” verilişinin yeni buraxılışı Xocavənd rayonunda, Quruçayın sol sahilində yerləşən Tağlar mağarasına həsr olunub.

Bildirilib ki, burada tarix metrlərlə ölçülür. Bir neçə santimetr torpaq bəzən yüzlərlə, hətta minlərlə ilin yaddaşını daşıyır. İndi isə alimlər həmin yaddaşın daha aşağı qatlarına enirlər. Çünki Tağlar mağarası haqqında bildiklərimiz hər an dəyişə bilər.

Qeyd olunub ki, bu, ötən əsrin qazıntısı deyil. Bu, yeni texnologiyaların, yeni sualların və yeni elmi metodların Tağlara qayıdışıdır. Azərbaycan alimləri ilə Tokio Universitetinin mütəxəssisləri mağaranın əvvəllər toxunulmamış hissələrində işləyirlər və qazıntı dərinləşdikcə ehtimallar daha da güclənir. Tağların yaşı əvvəllər düşündüyümüzdən daha qədim ola bilər.

Vurğulanıb ki, Tağlar mağarasında hazırda Azərbaycan-Yaponiya Beynəlxalq Arxeoloji Ekspedisiyasının üçüncü tədqiqat mövsümüdür. Məqsəd, sadəcə, yeni daş alətlər tapmaq deyil. Məqsəd bu mağaranın zaman xəttini mümkün qədər dəqiq qurmaqdır.

Maraqlıdır, insanlar burada nə vaxt peyda olub, nə qədər müddət və hansı iqlim şəraitində yaşayıblar? Nə yeyiblər, daş alətləri necə hazırlayıblar? Burada neandertallar yaşayıblarsa, onlar müasir insanlarla qarşılaşıblarmı?