“Cahil insan biliksiz insan deyil” | İnsanı Allahdan uzaqlaşdıran təkəbbürdür, yoxsa...? - AMİN

“Amin” verilişinin yeni buraxılışında ilahiyyatçı Ağa Hacıbəyli ilə cəhalət mövzusu müzakirə olunub.

İlahiyyatçı həqiqəti qəbul etməməyi və ona qarşı inadkarlıq göstərməyi cahilliyin ən böyük əlaməti kimi qiymətləndirib:

“Gerçəkliyi görüb ondan üz döndərmək cəhalətdir. 21-ci əsrin insanı ilə cahiliyyə dövrünün qaranlığında yaşayanlar arasında mahiyyət etibarilə heç bir fərq yoxdur. O dövrdə də güclü zəifi əzirdi, bu gün də atom bombasını kəşf edən biri zəif insanın haqqını tapdalayır. Məhz buna görə “Qurani-Kərim” cəhalətə qarşı müharibə elan edir, lakin bu savaşı qılıncla, topla deyil, elmlə, hikmətlə və əxlaqla aparır”.

A.Hacıbəyli həmçinin informasiya əsrində elmdən uzaq düşməyin və kor-koranə təqlidçiliyin fəsadlarına toxunub:

“Əvvəllər insanlar elmə, bilgiyə çatmaq üçün uzun zaman qət edirdilər, bu gün bütün informasiyalar əlimizdəki telefondadır. Lakin insan tədqiq etməli, kor-koranə təqliddən təhqiqi (araşdırmaya əsaslanan) imana keçməlidir. Bu gün dünya qədər bilgisi olan, lakin təkəbbürü ucbatından Allah qarşısında baş əyə bilməyən insanlar var. Əsl cahillik budur”.