DİN-dən zibil yeşiyinə atılan körpə ilə bağlı açıqlama

Paytaxtın Sabunçu rayonu, Tatarski küçəsindəki zibil qutularından birində təzə doğulan 10-15 günlük körpə tapılıb. O, sakinlər tərəfindən dərhal polis əməkdaşlarına təhvil verilib.

Tükürpərdən hadisə ərazidə yerləşən sexin müşahidə kameralarına əks olunub. Görüntülərdən məlum olur ki, ana körpəsini zibil yeşiyinə atmadan öncə ətrafda insanların azalmasını gözləyir.

Ana tərəddüd belə etmədən yeni doğulan uşağını əlindəki tullantı ilə bərabər zibil qutusuna atıb, ərazini tərk edir. Hadisədən 1 saat sonra 2 sakin körpəni zibillikdən götürür. Körpə Qarayev adına 2 saylı uşaq poliklinikasına yerləşdirilib. Məlumata görə, hazırda körpə müayinələrdən keçirilir. Vəziyyəti stabil ağırdır.

Daxili işlər Nazirliyindən isə bildirilib ki, ötən gün Sabunçu rayonunda yeni doğulmuş körpənin məişət tullantıları qutusunda tapılması barədə ərazi üzrə Sabunçu Rayon Polis İdarəsinin 12-ci Polis Şöbəsinə məlumat daxil olub:

"Dərhal şöbənin əməkdaşları tərəfindən uşaq həmin yerdən götürülərək tibb müəssisəsinə yerləşdirilib. Körpənin anası polis əməkdaşları tərəfindən qısa zamanda müəyyən edilərək Sabunçu RPİ-nin 12-ci Polis Şöbəsinə gətirilib. Hazırda həmin şəxs barəsində toplanmış materiala hüquqi qiymət verilməsi üçün iş Sabunçu Rayon Polis İdarəsinin İstintaq Şöbəsinə göndərilib. Araşdırmalar davam edir”.