Erməni vandallığının nakam qurbanları

İyunun 19-u səhər saatlarında Ağdam rayonunda minatəmizləmə işləri aparılan zaman bir neçə insana aid sümüklər aşkarlanıb.

Kütləvi məzarlığa Ağdamın işğaldan azad olunan Sarıcalı kəndi ərazisində, Ağdam-Hindarx yolunun kənarında rast gəlinib. Həmin insan qalıqlarının Birinci Qarabağ müharibəsi dövründə ermənilər tərəfindən öldürülən soydaşlarımıza aid olduğu artıq təsdiqini tapıb. Bu isə Ermənistanın soyqırımını dövlət siyasətinə çevirməsinin növbəti sübutudur və bu cür əməllər artıq təəccüb yaratmır. Çünki buna qədər Xocavənd, Başlıbel və Şuşa da daxil olmaqla Qarabağın müxtəlif ərazilərində bu cür məzarlıqlar aşkar olunub. Bununla belə, təxminən 4 minədək soydaşımızın taleyindən hələ də xəbərsizik.

Azərbaycanlılara qarşı müxtəlif dövrlərdə kütləvi qətliamlar törədən bədnam qonşularımız illərdir qondarma erməni soyqırımı oyununu siyasi alətə çevirməklə məşğuldur. Təkcə Xocalı faciəsi onların bu siyasi oyunlarının, yalançı məsum obrazlarının arxasında əslində bir yırtıcının dayandığını təsvir etməyə yetir. Ancaq o gecə törədilmiş vəhşiliklərin, həmçinin buna bənzər digər müharibə cinayətlərinin üstündən bir neçə on illər keçsə də, nədənsə dünya ictimaiyyətinin gözü kor olub.

Bu gün Qarabağdakı ermənilər üçün timsah göz yaşları axıdanlar düz 31 il əvvəl elə Xankəndinin lap yaxınlığında soyqırımı aktının törədildiyindən doğrudanmı hələ də xəbərsizdirlər?