Ev aldılar, sevincləri burunlarından gəldi | "Deyir ki, çıx get, öz evin var da" - Baku TV

Baku TV-nin qaynar xəttinə daxil olan şikayətdə sakinlər bildirirlər ki, artıq altı ildir Nəsimi rayonu, Mircəlal küçəsində yerləşən binalardan birinə köçsələr də, hələ də çıxarış ala bilmirlər.

Onların sözlərinə görə, “İqtisadçı 2005” MTK-nın sahibi sakinləri müxtəlif bəhanələrlə yubadır.

Sakinlərdən biri bildirib: “Demək olar ki, hər ay zəng edirik. Bir ay, 10 gün, 15 gün aralıqlarla əlaqə saxlayırıq. Hər dəfə yeni bir bəhanə gətirir. Deyir ki, guya məsələləri həll edib, sənədlər veriləcək. Öyrəndiyimizə görə, binanın layihəsində qaraj nəzərdə tutulsa da, hazırda qaraj yoxdur. Həmçinin mansard hissədə yaşayış üçün nəzərdə tutulmayan sahədə beş mənzil tikilərək satılıb. Sonuncu dəfə noyabr ayında danışmışıq. Ondan sonra isə zənglərimizə cavab verilməyib”.

Digər sakin isə qeyd edib ki, mənzil alarkən onlara bütün sənədlərin veriləcəyi vəd olunub:

“MTK-nın sahibi Hüseynov Coşqun bizə söz vermişdi ki, ödənişlər tamamlandıqdan, qaz, su, işıq çəkildikdən və mənzillərin satışı bitdikdən sonra çıxarış veriləcək. Amma illər keçsə də, problem həllini tapmayıb. Çıxarış bizim üçün çox vacibdir. Uşaqlarımızı qeydiyyata sala bilmirik, bankdan kredit götürə bilmirik. Xəstəxanada belə qeydiyyat problemi yaşayırıq. Məcbur olub qohumların və ya tanışların ünvanına qeydiyyata düşürük. Bu da sonradan narazılığa səbəb olur”.