“Ev yıxmaq istəyən bunu edir” | Dəhşətə gətirən əməllər | Cadular görün necə üzə çıxdı - Baku TV

Xəzər dənizinin suyunun geri çəkilməsi nəticəsində Bakı çimərliklərinin birində iç-içə keçirilmiş qıfıllar, düyünlənmiş saplar və digər oxşar əşyalar üzə çıxıb.

El arasında “cadu” adlandırılan bu əməllərə bəzi insanlar inansa da, mövzuya mövhumat kimi yanaşanlar da az deyil.

Baku TV mövzu ilə bağlı paytaxt sakinləri arasında sorğu keçirib.

“İnsanlar cadunu ev yıxmaq, kiminsə qara gününü arzulamaq üçün edirlər”, – vətəndaşlardan biri söyləyib.

Digər bir sakin isə qeyd edib:

“Mən caduya inanmıram. Fikrimcə, bu, cahillikdən irəli gəlir”.

Mövzu ilə bağlı ilahiyyatçı Tural İrfan bildirib ki, islam dini bu cür inanclara birmənalı şəkildə qarşı çıxır:

“Hesab edirəm ki, din xadimləri bu mövzuda daha çox məsuliyyət daşıyırlar. Onlar cəfəngiyyat məsələlər əvəzinə bu kimi problemləri ictimaiyyətin diqqətinə çatdırmalı, insanları belə inanclardan uzaq tutmalıdırlar”.

Psixoloqlar isə bildirirlər ki, cadunun təsiri yalnız ona inanan insanlarda özünü göstərə bilər.

Psixoloq Gülər Məmmədova mövzu ilə bağlı qeyd edib ki, insanlar özlərinin və ya başqalarının həyatında dəyişiklik etmək məqsədilə müxtəlif inanc sistemlərinə üz tuturlar:

“Xüsusilə intellektual səviyyələri qarşılaşdıqları problemləri həll etməyə yetərli olmayan şəxslər batil inanclara yönəlirlər. Bu əməllərin isə ona inanmayanlara heç bir təsiri yoxdur”.