Fortepiano melodiyalarının insanın emosional vəziyyətinə müsbət təsiri diqqət çəkir

Sakitləşdirici fortepiano musiqiləri stresdən sonra orqanizmin bərpasına yağış, çay və şəlalə səslərindən daha tez kömək edə bilər.

Bu musiqi əhvali-ruhiyyəni yaxşılaşdırır, ürək döyüntülərinin tezliyini və tərləməni azaldır, həmçinin eşitmə və orqanizmin vəziyyətinin tənzimlənməsində iştirak edən beyin şəbəkələri arasındakı əlaqələrə müsbət təsir göstərir.

Çin Elmlər Akademiyasının Psixologiya İnstitutunun tədqiqatçıları bu qənaətə gəliblər.

Araşdırmada 120 gənc iştirak edib. İlk mərhələdə könüllülər vaxt məhdudiyyəti şəraitində mürəkkəb riyazi tapşırıqları yerinə yetiriblər. Hər suala cavab vermək üçün cəmi üç saniyə vaxt ayrılıb. Vaxtı gecikdirdikdə və ya səhv cavab verdikdə iştirakçılara dərhal xəbərdarlıq edilib.

Sınaqdan sonra iştirakçılara ya fortepiano musiqisi, ya da su səsləri dinlədilib. Alimlər onların əhvali-ruhiyyəsini, ürək döyüntülərinin tezliyini, tərləmə səviyyəsini və stres hormonu olan kortizolun miqdarını ölçüblər.

Nəticələr göstərib ki, gərgin tapşırıqdan sonra fortepiano musiqisi dinləyən iştirakçılar su səslərini dinləyənlərlə müqayisədə daha tez özlərinə gəliblər. Musiqi dinləyənlərin əhvali-ruhiyyəsi daha çox yaxşılaşıb, nəbz və tərləmə göstəriciləri isə daha sürətlə azalıb.

Tədqiqatçılar hesab edirlər ki, musiqi insanı sadəcə xoşagəlməz hisslərdən yayındırmır. Gərginlik və rahatlama mərhələlərinin növbələşdiyi, proqnozlaşdırıla bilən musiqi quruluşu beyniin səsin qavranılmasına və orqanizmin stresə reaksiyasına cavabdeh olan sistemləri arasındakı əlaqələrin yenidən qurulmasına kömək edə bilər.