Gürcü politoloqlardan azərbaycanlı ekofəallara dəstək
Qarabağdakı yataqlarımızın qanunsuz istismarına görə Rusiya sülhməramlı kontingentinin məsuliyyət zonasında gərginləşən vəziyyət gürcü politoloq və ekspertlərin də narahatlığına səbəb olub.
Separatçıların apardığı qanunsuz istismar fəaliyyətinin qəbuledilməz olduğunu bildirən gürcü ekspertlər Baku TV-yə verdikləri müsahibələrində azərbaycanlı ekofəalların aksiyasını tam dəstəklədiklərini vurğulayıblar.
Gürcü politoloqlar Azərbaycanın probleminin Gürcüstan üçün də önəm daşıdığını deyərək, ermənilərin bu ölkənin Abxaziya bölgəsindəki gülünc ərazi iddialarından danışıb.
“Ermənilər Abxaziyada dənizə gedib daşların üzərinə “bura Ermənistan torpaqlarıdır” yazırdılar. Buna görə də bu gün Azərbaycanın problemi bizim də problemimizdir. Çünki biz qonşu, dost, tərəfdaş və qardaş dövlətlərik. Yalnız biz deyil, bu gün bütün region Ermənistanın Azərbaycan ərazilərindəki təbii sərvətləri talan etməsinə sərt etirazını bildirməlidir”, - deyə politoloq Elquja Kaftaradze qeyd edib.
Gürcü ekspertlər erməniləri tutduqları əməldən əl çəkməyə və Azərbaycan ərazilərindəki yataqların qanunsuz istismarı nəticəsində törətdikləri ekoloji soyqırıma da son qoymağa çağırıblar.