Heyvan kəsimi və satışı məntəqələrinə nəzarət başladı | Ünvanların siyahısı nə vaxt açıqlanacaq?

İyunun 6-7-də qeyd olunacaq Qurban bayramı günlərində daha çox heyvanın kəsimi və satışının həyata keçirildiyini nəzərə alaraq hazırda ölkə üzrə heyvan kəsimi və satışı məntəqələrində Azərbaycan Qida Təhlükəsizliyi Agentliyi (AQTA) tərəfindən monitorinqlər keçirilir.

Bu barədə AQTA-dan məlumat verilib.

Bildirilib ki, aparılan monitorinqlərin nəticələrinə əsasən, qurbanlıq heyvanların kəsimi və satışı yerlərinin ünvanları yaxın günlərdə Agentliyin saytında yerləşdiriləcək və siyahı ictimaiyyətə açıqlanacaq. Həmin ünvanlarda baytarlıq nəzarətindən keçmiş qurbanlıq heyvanlar sifarişçilərə təqdim olunacaq, onların kəsimi isə baytarlıq-sanitariya tələblərinə cavab verən məntəqələrdə aparılacaq.

Bununla yanaşı, vətəndaşların tələbatı nəzərə alınaraq bir sıra regionlarda AQTA ilə razılaşdırılmaqla yerli icra orqanları tərəfindən səyyar heyvan kəsimi çadırlarının quraşdırılaraq qurbanlıq heyvanların baytarlıq nəzarəti altında kəsimi və satışı nəzərdə tutulur.

Qeyd olunub ki, baytarlıq-sanitariya və sanitariya-gigiyena normalarına cavab verməyən yerlərdə, o cümlədən küçə, yol kənarı, məhəllə və digər ictimai yerlərdə heyvan kəsimi, satışı, eyni zamanda baytarlıq şəhadətnaməsi və ya arayışı olmadan iri, xırdabuynuzlu heyvanların daşınması yolverilməzdir.

Əlavə olunub ki, bayram günlərində satış üçün nəzərdə tutulan heyvanların sağlamlığı şübhə doğurduqda, eyni zamanda qanunvericiliyin tələblərinə məhəl qoyulmadan küçə və yol kənarlarında antisanitar şəraitdə heyvan kəsimi, satışı halları ilə rastlaşdıqda vətəndaşlardan hüquq-mühafizə və yerli icra orqanlarına, eləcə də Agentliyin “1003” Çağrı Mərkəzinə məlumat vermələri xahiş olunur.