İlham Əliyev Talış kəndinin strateji əhəmiyyətindən danışdı

“Talış kəndi 2020-ci il oktyabrın 3-də azad edilib. İkinci Qarabağ müharibəsi başlayandan bir həftə sonra qan tökərək biz artıq Talış kəndini azad etdik, eyni zamanda Suqovuşan qəsəbəsini azad etdik”.

Bu sözləri martın 18-də Prezident İlham Əliyev Novruz bayramı münasibətilə Tərtər rayonunun Talış kəndində Azərbaycan xalqına müraciətində söyləyib.

Prezident vurğulayıb ki, İkinci Qarabağ müharibəsi dövründə o hərbi əməliyyatın çox böyük əhəmiyyəti var idi: “Çünki biz öz azadlıq savaşımızı müxtəlif istiqamətlərdə aparırdıq. Ona görə bu istiqamətdə əldə edilmiş uğurlar müharibənin gələcək gedişatı üçün çox böyük önəm daşıyırdı, eyni zamanda ordumuzun və xalqımızın mənəvi ruhunu da yüksəldirdi. Çünki Talış kəndinin strateji əhəmiyyəti hər kəsə bəlli idi”.