İqtisadçıdan açıqlama | Azərbaycanda özəl pensiya fondu yaradılır

Dövlət Sosial Müdafiə Fondunun İdarə Heyətinin sədri Himalay Məmişovun bildirdiyinə görə, özəl pensiya fonduna ödəniş könüllü olacaq.

Belə ki, vətəndaş məcburi sosial sığorta haqqı ilə yanaşı, belə fonda da vəsait ödəyə bilər.

Bəs özəl pensiya fondları əhaliyə nə qazandıracaq?

İqtisadçı Xalid Kərimli bildirib ki, özəl pensiya fondu işləyən şəxslər üçün nəzərdə tutulub:

“Burada işləyən şəxslərin əlavə pensiya təminatının formalaşmasından söhbət gedir. Bu fondun maliyyə mənbəyi işləyən şəxsin könüllü surətdə öz əməkhaqqısından əlavə ödənişləri əsasında formalaşacaq. Burada məcburilik yoxdur. Fond həmin pulları risksiz dövlət sənədlərinə yatıracaq. Vətəndaş təqaüdə çıxanda artıq dövlətin kəsdiyi pensiyadan əlavə vəsait almaq imkanlarına malik olacaq”.

İqtisadçı Rəşad Həsənov isə hesab edir ki, qanunun hazırlanması hələ özəl fondun yaradılacağı demək deyil. Onun sözlərinə görə, ölkədə özəl pensiya fondlarının yaradılması üçün şərait formalaşmayıb.

İqtisadçı qeyd edib ki, bu baxımdan vətəndaşların 20-30 il ərzində pensiya fonduna ödəniş etmələri real görünmür. Bundan başqa, əhalinin xərclərinin 55-60 faizini ərzaq məhsullarının alınması təşkil etdiyindən yığmağa vəsaitləri qalmır. Bu səbəbdən çox az insanın özəl pensiya fonduna vəsait yönəltməyə imkanı var.