İşləməyən qaz sayğacları insanları küçələrdə qoydu | "Azəriqaz" problemə necə yanaşdı? - Baku TV

Yeni ilin ilk günlərindən etibarən bəzi ərazilərdə smart-kart tipli qaz sayğaclarından istifadə edən sakinlər qaz təchizatında yaranan problemlər səbəbindən çətin vəziyyətlə üzləşiblər.

Məsələ ilə bağlı vətəndaşlar Baku TV-nin qaynar xəttinə müraciət edərək kartla ödəniş zamanı texniki problemlərin yarandığını bildiriblər.

Onların sözlərinə görə, terminal vasitəsilə ödəniş etməyə cəhd göstərilsə də, əməliyyat uğursuz olur.

“Dünəndən bəri qaz gəlmir. Terminal vasitəsilə ödəniş etməyə çalışırıq, amma sistemdə “əməliyyat səhvdir” mesajı çıxır”, – deyə sakinlərdən biri bildirib.

“Anam 40 dərəcə qızdırmadan əziyyət çəkir, körpə uşaq da onun kimidir. Evdə qaz yoxdur. Dərdimizi kimə deyək?”, – başqa bir sakin vurğulayıb.

Məsələ ilə bağlı “Azəriqaz” İstehsalat Birliyindən bildirilib ki, bu il yanvarın 1-dən smart-kart tipli bəzi qaz sayğaclarının ödəniş sistemində yaranmış problem elə həmin gün saat 20:00-da aradan qaldırılsa da, sistem kütləvi əməliyyatlar aparılması zamanı təkrar xətalarla üzləşib:

“Məlum olduğu kimi, təqvim ilinin əvvəli olması ilə əlaqədar müraciətlərin sayı da çox olur. Müraciət sayı çox olduğundan yenidən müəyyən xətaların olduğunu aşkar etdik. Yaranmış çətinliyin qısa müddətdə aradan qaldırılması istiqamətində mütəxəssislər çox ciddi şəkildə işlər aparırlar”.