İsmayıllıda Milli Qurtuluş Günü qeyd edilib

İsmayıllıda 15 İyun – Milli Qurtuluş Günü qeyd olunub.

Əvvəlcə ulu öndər Heydər Əliyevin abidəsi ziyarət edilib, xatirəsi ehtiramla yad edilib. Sonra ümummilli lider Heydər Əliyevə həsr olunmuş foto-sərgiyə baxış keçirilib. Tədbir Dövlət Himninin səsləndirilməsi ilə açıq elan edilib.

Rayon İcra Hakimiyyətinin təşkilatçılığı ilə keçirilən bayram tədbirində hüquq-mühafizə orqanlarının rəhbərləri, şəhid ailələri, qazilər, idarə, müəssisə və təşkilat rəhbərləri və ictimaiyyət nümayəndələri iştirak ediblər. Ulu öndər Heydər Əliyevə və 15 İyun – Milli Qurtuluş Gününə həsr edilmiş film nümayiş edilib.

Rayon Gənclər və İdman İdarəsinin rəisi Taleh Salehov “Milli dövlətçiliyimizin xilaskarı” mövzusunda çıxış edərək, ulu öndərin xalqın tələbi ilə 2-ci dəfə hakimiyyətə gəlişinin müasir Azərbaycan tarixindəki müstəsna əhəmiyyətindən danışıb.

Qeyd olunub ki, məhz ümummilli lider Heydər Əliyevin hakimiyyətə gəlişi ilə Azərbaycanda mövcud olan xaosa, özbaşınalığa son qoyulub, vətəndaş müharibəsi təhlükəsi aradan qaldırılıb, sabitlik bərpa olunub. Digər çıxış edənlər də müstəqil dövlətimizin qurtuluş tarixindən, Heydər Əliyevin xilaskarlıq missiyasıdan söhbət açıblar.

Tədbirdə həmçinin Yeni Azərbaycan Partiyası sıralarına qəbul olunan gənclərə partiya biletləri təqdim olunub və Milli Qurtuluş Günü ilə bağlı keçirilən şeir müsabiqəsinin qalibləri mükafatlandırılıb.

Rəsmi hissədən sonra Rayon Mədəniyyət Mərkəzinin hazırladığı konsert proqramı tədbir iştirakçıları tərəfindən maraqla dinlənilib.