MM-in iclasında Elgünün qətlə yetirilməsi ilə bağlı nə danışıldı?

Mən son günlər cəmiyyəti sarsıdan, böyük gərginliyə səbəb olan bir məsələyə – Gəncədə qətlə yetirilən 17 yaşlı məktəbli Elgün İbrahimovun faciəsinə diqqət yönəltmək istəyirəm.

Bunu Milli Məclisin mayın 23-də keçirilən iclasında deputat Elnarə Akimova bildirib.

Bu faciələrin qarşısının alınmasına toxunan deputat vurğulayıb ki, məktəblərdə psixologiya fənninin dərinləşməsinə diqqət yetirilməlidir:

“Psixoloqlarımızın məktəblərə cəlb olunmasına və onlara ayrılmış zaman çərçivəsində, həqiqətən də, məktəblilərlə psixoloji təlimlər keçirilməsinə, psixoloji hazırlıqlara rəvac verilməsinə çox böyük ehtiyac var. Əsl psixologiya peşəsinə sahib olanlar bura cəlb olunmalıdırlar. Yəni kimya, fizika, texnologiya və yaxud biologiya müəllimi gəlib psixologiya fənnini tədris etməməlidir”.

Elnarə Akimova qeyd edib ki, məktəblərdə mütaliəsiz nəsil yetişir:

“Dil çevrəsi qapanmış, xəyal dünyası daralmış, beyinləri kilidlənmiş, ədəbiyyatdan uzaq düşən bir nəsil yetişir və bu, artıq böyük bir problemə çevrilməkdədir. Təhsilimizdə, dərsliklərimizdə ədəbiyyatımıza diqqət bir başqa olmalıdır. Çünki ədəbiyyat daha çox mənəviyyata toxunan, mənəviyyata xidmət edən bir sahədir”.