Namiq Məna ailə üzvlərinin düşdüyü dəhşətli qəza barədə nə danışdı? - Baku TV

Məşhur meyxanaçı Namiq Məna Qubada qəzaya düşən qızının ailəsindən danışıb.

“Pravda”nın məlumatına görə, meyxana ustadı bildirib ki, hadisə zamanı havanın temperaturu mənfi beş-altı dərəcə olub.

“Qızım ailəsi ilə birlikdə avtomobildə gedərkən maşın yerində 2-3 dəfə fırlanıb və dərədən aşağı yuvarlanıb. Bunu sürücü məsuliyyətsizliyi, səriştəsizliyi, səhlənkarlığı kimi dəyərləndirirəm. Sürücü öz kürəkənim olub. Quba yolları bir az ona yaddır. Bir müddət Rusiyada yaşayıb. Oranın buzlu, şaxtalı yolları ilə bizim yolların ciddi fərqi var. Düşünüb ki, sürmək olar. Həmin yolda sərt döngələr var. Kürəkənimdə özünə arxayınlıq olub ki, sərt döngələrdə manevr edə bilər. Nəticə isə belə oldu. Şükür Allaha, ciddi xəsarət alan olmayıb. Maşın dərəyə yuvarlananda təkər kollara ilişib və partlayıb, nəticədə dayanıb. Yoxsa yuvarlanıb dərədən aşardı, ciddi fəsad törədə bilərdi. Allahın hər anına şükürlər olsun, yəqin, belə məsləhət imiş. Sarsıntı keçiriblər, amma təkrar deyirəm, ciddi xəsarət almayıblar”, – deyə Namiq Məna qeyd edib.

“Nəvəmin 12 yaşı var. Sanki hadisə olacağını əvvəlcədən duyub. Planşetlə hadisəni çəkib. Deyirəm ki, niyə sona qədər çəkməmisən? Həmin vaxt onu bir az güldürdüm. Dedi ki, baba, planşet əlimdən yerə düşdü, yoxsa sona qədər çəkəcəkdim. Soruşdum ki, qorxmamısan? Dedi ki, yox. Bildirdim ki, qorxmaq lazım deyil, hadisədən heç kim sığortalanmayıb. Həmin an maşının içində sıxışıb qalmışdılar. Ürək-dirək verirdim. Belə ciddi hadisələr olanda hər zaman soyuqqanlı yanaşıram, amma inanın, bir neçə gün keçib, görüntülərə yenidən baxıram, indi daha çox təsir edir. Doğrudan da, böyük bəladan qurtulublar”, – deyə tanınmış meyxanaçı əlavə edib.