“Oğlum olmasa, çox adam ölərdi” | Terrorçunu əliyalın zərərsizləşdirən qəhrəmanın anası - O VAXTLAR

“O vaxtlar” verilişinin budəfəki qonağı Şuşa sakini Təranə Tağıyeva olub.

O, uşaqlıq illərindən, Şuşa həsrətindən, ailə dəyərlərindən, eləcə də Azərbaycanın İrandakı səfirliyinə terror hücumu zamanı qəhrəmanlıq göstərən oğlu Vasif Tağıyevdən danışıb.

Təranə Tağıyeva bildirib ki, Şuşada qızların tərbiyəsinə, ailə dəyərlərinə və adət-ənənələrə xüsusi önəm verilirdi. Onun sözlərinə görə, elçilər ailələrinin qapısını iki-üç dəfə döyüb, yalnız bundan sonra razılıq alıblar:

“2-3 dəfə qapımıza gəliblər ki, məni istəsinlər. Atam hər dəfə deyirdi ki, hələ uşaqdır. Amma israr etdilər, axırda razılıq verdi”.

Şuşanın işğalı dövrünü xatırlayan qonaq həmin günlərin həyatlarının ən ağır dönəmi olduğunu deyib:

“Təzə evlənmişdik. Evimiz, cehizimiz, hər şeyimiz təzə idi. Amma vəziyyət ağırlaşdığı üçün uşağı götürüb çıxmalı olduq. Bombalardan qorxduğumuz üçün günlərlə zirzəmidə qalırdıq. Sonra Şuşanı tərk etdik, hər şeyimiz orada qaldı”.

Verilişdə Tehrandakı Azərbaycan səfirliyinə terror hücumu zamanı silahlı hücumçunu əliyalın zərərsizləşdirən Vasif Tağıyevdən də söz açılıb. Təranə Tağıyeva həmin gün yaşadıqlarını belə xatırlayıb:

“Hadisə günü oğlumla səhər danışmışdım. Sonra terror xəbəri gəldi. Dəfələrlə zəng etdim, cavab vermədi. Axırda görüntülü danışdıq, yaralı idi. Onda dedi ki, narahat olma, yaxşıyam. Düşünürəm ki, oğlum orada olmasaydı, çox adam ölərdi”.