Ölkə üzrə neçə min hektar ərazi sığortalandı? | Rəsmi açıqlama
“41 bitki və bitki məhsulunun sığortalanması o deməkdir ki, ölkə ərazisinin 96 faizi və fermerlərimizin 95 faizi üçün sığorta xidmətlərinin əlçatanlığı təmin edilib. Bu o deməkdir ki, əhatəmizi 4-5 faiz genişləndirərək bitkiçilik üzrə aqrar istehsalını tam əhatə etmiş olacağıq”.
Bu sözləri jurnalistlərə açıqlamasında Aqrar Sığorta Fondunun idarə heyətinin sədri Fuad Sadıqov söyləyib.
Onun sözlərinə görə, təminat altında 453 min hektar ərazi sığortalanıb:
“480 milyon manatlıq sığorta məbləği fond tərəfindən öhdəlik olaraq üzərimizə götürmüşük. 480 milyon manatlıq öhdəliyi götürərək 11 milyon manat sığorta haqqı sığorta müqavilələri üzrə götürmüşük ki, bunun 5,5 milyon manatı dövlətimiz tərəfindən ödənilib, 5,5 milyon manatı isə fermerlər tərəfindən ödənilib”.
“Bu il ərzində ölkənin 53 şəhər və rayonlarında sığorta hadisələrinin olmasına dair bizə müraciətlər edilib və sığortaladığımız 453 min hektar ərazinin 140 min hektarında artıq tam və ya qismən sığorta hadisələrinin olması barəsində bizə müraciətlər daxil olub”, – deyə o qeyd edib.
![icon](/images/loading.png)