Onlayn kazino həvəskarlarına bəd xəbər | Qadağalar mövcud olsa da...

Son zamanlar ölkədə onlayn qumar oyunlarına maraq artıb.

Edilən qadağalara, görülən tədbirlərə baxmayaraq, hələ də qeyri-qanuni mərc oyunlarının keçirilməsinə, eləcə də sosial şəbəkələrdə reklamlarına rast gəlinir.

Nəticədə qadağan olunduğu halda bəzi Azərbaycan vətəndaşları virtual qumar oyununun iştirakçısına çevrilir.

Qeyd edək ki, onlayn qumarbazların şans nəticəsində qazandığı dövriyyədən asılı olaraq həmin şəxs minimum 5 min manatdan 10 min manatadək cərimə və ya 2 il həbs oluna bilər.

Bəs virtual qumar oyunlarına giriş məhdudlaşdırıla bilərmi?

Elektron Təhlükəsizlik Xidmətindən bildirilib ki, “Azərbaycan Respublikasının Rəqəmsal İnkişaf və Nəqliyyat Nazirliyi yanında Elektron Təhlükəsizlik Xidməti haqqında Əsasnamə”nin müvafiq maddəsinə görə, ETX yayılması qadağan edilən informasiyanın yayılmasının qarşısının alınması məqsədilə internet informasiya ehtiyatlarının (dövlət qurumlarının internet informasiya resursları istisna olmaqla) fəaliyyətinin mütəmadi monitorinqini aparır:

“Xidmət yayılması qadağan edilən informasiyanın internetdə yerləşdirilməsi halları aşkarlandıqda qanunvericiliyə uyğun olaraq, tədbirlərin həyata keçirilməsini və yaxud digər dövlət qurumları ilə aidiyyəti üzrə birgə işlərin aparılmasını təmin edir”.