Paytaxtda ev almaq istəyənlərin nəzərinə | Mənzillərin qiyməti neçədən başlayır?

Son 5 il ərzində Azərbaycanda mənzillərin qiymətinin 46% artması fonunda paytaxtda ev almaq istəyənlər üçün qiymət araşdırması aparılıb. Mərkəzi Bankın hesabatına görə, pandemiyadan sonra daşınmaz əmlak bazarında artım dayananmır. Ekspertlər hazırda 100 min manatlıq büdcə ilə hansı ərazilərdən ev almağın mümkün olduğunu açıqlayıblar. Rieltor Yusif Quliyevin sözlərinə görə, bu məbləğə Masazır, Xırdalan kimi şəhərətrafı ərazilərdə həyət evi və ya yeni tikilidə birotaqlı mənzil, həmçinin "Neftçilər" və "Xalqlar Dostluğu" metrosu yaxınlığında birotaqlı mənzil tapmaq olar. Azərbaycan Qiymətləndiricilər Cəmiyyətinin sədri Vüqar Oruc isə bu qiymətə Yeni Yasamal, Hövsan, Masazır kimi ərazilərdə orta təmirli 1-2 otaqlı mənzillərin təklif olunduğunu bildirib. Elan saytlarında 100 min manatadək təkliflər daha çox Masazır və Binə qəsəbələrində, qismən isə "İnşaatçılar" və "Memar Əcəmi" ətrafında da mövcuddur.