Pensiyanı birdəfəlik necə almaq olar? | Şəhərdə sorğu keçirildi

Dünya təcrübəsində pensiya kapitalının birdəfəyə ödənilməsi ilə bağlı nümunələr az deyil.

Azərbaycanda isə dövlətlə yanaşı, özəl pensiya fondlarının yaradılması nəzərdə tutulur.

Bəs ölkəmizdə pensiya kapitalını birdəfəyə almaq və yaxud da həmin vəsaiti özəl fondlara qoymaq mümkündür?

İqtisadçı Rəşad Həsənov deyir ki, Azərbaycanda pensiya kapitalının birdəfəlik götürülməsi mümkün deyil:

“Ümumiyyətlə, növbəti illərdə də reallaşacağı ilə bağlı ehtimallar yoxdur. Bu, mövcud pensiya sisteminə maliyyə dayanıqlılığı baxımından ciddi risklər yarada bilər. Çünki bu günün özündə belə hələ də Azərbaycanda pensiya fondu dövlət tərəfindən transfer edilən subsidiya hesabına pensiya xərclərini kapitallaşdırır. Gələcəkdə ola bilsin ki, kapitalın qismən geri qaytarılması və yaxud birdəfəlik götürülməsinə zəruri hallarda şərait yaradılsın”.

Baku TV məsələ ilə bağlı paytaxt sakinlərinin də rəyini öyrənib. Sorğudan məlum olub ki, vətəndaşlar dövlət Sosial Müdafiə Fonduna illərlə ödədikləri vəsaiti birdəfəlik geri almaq istəyir.

“İmkan olsaydı, pensiyanı birdəfəlik alardım. Çünki sabah nə olacağını bilmək olmur”, – paytaxt sakini deyib.