Qəbələ və Şəkidə qanunsuz ocaqxanalar

Dövlət Yanğın Nəzarəti Xidmətinin əməkdaşlarının keçirdiyi monitorinqlər zamanı Qəbələ rayonunun Nic qəsəbəsi və Yengicə kəndi, həmçinin Şəkinin Aşağı Göynük kəndi ərazilərində bağ və yaşayış sahələrinin yaxınlığında qeyri-qanuni yolla ağac kömürü istehsal edən dörd ocaqxana aşkarlanıb.

Fövqəladə Hallar Nazirliyindən bildirilib ki, qanunsuz fəaliyyətlə məşğul olan işbazlar kustar üsulla düzəltdikləri, heç bir yanğın təhlükəsizliyi qaydalarının tələblərinə cavab verməyən ocaqxanaların istismarı ərazidə yanğın təhlükəsizliyini yaratmaqla, baş verə biləcək yanğının qısa zamanda geniş əraziyə yayılmasına, eləcə də təbiətə, insan həyatı və sağlamlığına təhlükə riskinin artmasına münbit zəmin yaradır.

Qanunsuz çalışan ocaqxanaların fəaliyyəti dayandırılıb. Qanunun tələblərini pozan şəxslər barəsində müvafiq tədbirlərin görülməsi üçün aidiyyəti dövlət qurumlarına rəsmi müraciətlər edilib.