Qəzadan sonra dağılan dayanacaq niyə bərpa edilmir? - Baku TV

Binəqədi rayonu, Biləcəri qəsəbəsi, Mikayıl Mikayılov küçəsində avtobus dayanacağının olmaması sakinlərin narazılığına səbəb olub.

Sakinlərin sözlərinə görə, ərazidə 20 ildən çox fəaliyyət göstərən dayanacaq təxminən 4 il əvvəl avtomobil qəzasından sonra yararsız vəziyyətə düşüb və götürülüb. Həmin vaxtdan 202 və 92 nömrəli marşrut avtobusları dayanacaqda saxlaya bilmir.

Dayanacağın yerində müvafiq yol nişanlarının olmaması iritonnajlı avtomobillərin ərazidə park edilməsinə şərait yaradır. Nəticədə, avtobuslar sərnişinləri yolun hərəkət hissəsində mindirib-düşürür, bu isə hərəkətdə çətinliklərə və tıxaclara səbəb olur.

Sakinlər bildirirlər ki, məsələ ilə bağlı dəfələrlə aidiyyəti qurumlara, o cümlədən Yerüstü Nəqliyyat Agentliyinə müraciət etsələr də, hələlik problem həllini tapmayıb.

Onlar xüsusilə yağışlı və küləkli havalarda məktəblilərin, işə gedib-gələnlərin və digər sərnişinlərin çətinliklə üzləşdiyini vurğulayaraq dayanacağın bərpa olunmasını istəyirlər.