Qüdrət Həsənquliyev qanunda dəyişikliklərə etiraz etdi

“20 il xidmətdən sonra müddətdən artıq xidmət edənlərin, zabitlərin ehtiyata çıxmaq hüquqları olmalı, onlar pensiya ala bilməlidirlər”.

Bu sözləri Bütöv Azərbaycan Xalq Cəbhəsi Partiyasının sədri, Milli Məclisin hüquq siyasəti və dövlət qurucluğu komitəsinin sədr müavini Qüdrət Həsənquliyev parlamentin plenar iclasında “Hərbi qulluqçuların statusu haqqında”, “Hərbi xidmətkeçmə haqqında” Əsasnamə”nin təsdiq edilməsi barədə, “Əmək pensiyaları haqqında” və “Hərbi vəzifə və hərbi xidmət haqqında” Azərbaycan Respublikasının qanunlarında dəyişiklik edilməsi barədə qanunun layihəsinin birinci oxunuşda müzakirəsi zamanı deyib.

“Biz təkcə hərbi xidmət müddətini artırmırıq, həm də onların mənzil almaq hüququnu da əllərindən alırıq. 20 il xidmətdən sonra onlar mənzil ala bilirdilər, indi o hüquq da onların əlindən alınır. Yəni o hüquq saxlanılımır ki, 25 il xidmət et və 20 ildən sonra mənzil al. Ümumiyyətlə bu gün ehtiyata çıxan zabitlər 3-5 il ərzində mənzillə təmin olunurlar”, – deyə o bildirib.

Millət vəkili əlavə edib ki, orduya xüsusi diqqət və qayğı lazımdır: “Bu müddətlərin artırılması, onların təhsil aldığı dövrün staja hesablanmaması sosial hüquqların məhdudlaşdırılmasıdır. İndi insanların çoxu Müdafiə Nazirliyi ilə müqavilə bağlayıblar. Müdafiə Nazirliyi ilə müqavilə bağlayanda onlar elə hesab edirdilər ki, 20 ildən sonra ehtiyata çıxa və mənzil ala biləcəklər. Amma indi birdən-birə onların bu hüququnu əllərindən alırıq”.